செவ்வாய் தோஷம்!

செவ்வாய் தோஷம்! 

இன்று திருமண வயதில் மகள் அல்லது மகன் உடைய பெற்றோர் அனவரும் தெரிந்து வைத்துள்ள ஒரு வார்த்தை "செவ்வாய் தோஷம்". செவ்வாய் தோஷம் பற்றி விவரமாக தெரிந்து கொள்வோம்.

செவ்வாய் இரத்த காரகன். இரத்த ஓட்டத்தின் அடிப்படையிலேயே உடலுறுப்புகள் நன்கு இயங்குவதும் தீர்மானிக்கப் படுகிறது. லக்னத்திற்கு 2, 4, 7, 8 ஆகிய இடங்கள் ஆயுளை - மரணத்தை தீர்மானிக்கும் இடங்கள். இந்த இடங்களில் அங்காரகன் எனப்படும் செவ்வாய் ஜனன ஜாதகத்தில் இருந்தால் இரத்த ஓட்டம், இரத்த அழுத்தம் வித்தியாசப்படும். ஆகவே, ஜனன ஜாதகத்தில் லக்னத்தில் இருந்து 2, 4, 7, 8, 12 ஆகிய இடங்களில் செவ்வாய் இருந்தால் செவ்வாய் தோஷம் ஏற்படுகிறது.

இன்னும் சற்று விரிவாகப் பார்ப்போம்:

தோஷத்தின் அளவீடு:

• 12 ம் பாவத்தில் இருந்தால் 20%
•  2 ம் பாவத்தில் இருந்தால் 40%
•  4 ம் பாவத்தில் இருந்தால் 60%
•  7 ம் பாவத்தில் இருந்தால் 80%
•  8 ம் பாவத்தில் இருந்தால் 100%

லக்னத்தில் இருந்து தோஷம் - பாதிப்பு 1 பங்கு

சந்த்ரனில் இருந்து தோஷம் -   பாதிப்பு 1/2 பங்கு

சுக்ரனில் இருந்து தோஷம் -     பாதிப்பு 1/4 பங்கு

செவ்வாய் தோஷத்தின் வகைகள்: (தோஷத்தின் அளவு இறங்கு வரிசையில்)

1. லக்னம், சந்த்ரன், சுக்ரன் - மூன்றிலிருந்தும் தோஷம் இருந்தால் 1+3/4 கடுமையான தோஷம்
2. லக்னம், சந்த்ரன் - இரண்டிலிருந்தும் ஏற்படும் தோஷம் 1+1/2
3. லக்னம், சுக்ரன் - இரண்டிலிருந்தும் ஏற்படும் தோஷம் 1+1/4
4. லக்னத்திலிருந்து மட்டும் ஏற்படுவது 1
5. சந்த்ரன், சுக்ரன் மூலமாக ஏற்படுவது 1/2+1/4
6. சந்த்ரனிலிருந்து மட்டும் 1/2
7. சுக்ரனிலிருந்து மட்டும் 1/4 (தோஷத்தின் அளவு மிகக் குறைவு)
தோஷம் உள்ள ஜாதகத்தோடு தோஷம் உள்ள ஜாதகத்தைத்தான் இணைக்க வேண்டும்.

இனி விதி விலக்குகளை காண்போம்:

தோஷம் இல்லாத நிலைகள்:

1. செவ்வாய் மேஷம், வ்ருச்சிகம், மகரம் ராசிகளில் இருப்பது
2. கடகம், சிம்மம், தனுசு, மீனம் ஆகியவற்றில் செவ்வாய் இருப்பது
3. புதன், குரு, சனி - இவர்களில் ஒருவர் செவ்வாயுடன் இருந்தால் அல்லது பார்த்தால்
4. செவ்வாய் நின்ற ராசி நாதன் லக்னத்திலிருந்து 1, 4, 5, 7, 9, 10 ஆகிய இடங்களில் இருப்பது அல்லது பார்ப்பது
5. கடக லக்னத்திற்கு செவ்வாய் எங்கிருந்தாலும்
6. குரு பார்வை அல்லது குருவுடன் சேர்ந்து செவ்வாய் இருப்பது
7. ரிஷபம், சிம்மம் லக்னமாக இருந்து, செவ்வாய்  மிதுனம், கன்னியில் இருப்பது (2 ம் இடம்)
8. மிதுனம், வ்ருச்சிகம் லக்னமாக இருந்து செவ்வாய் ரிஷபம், துலாம் ராசிகளில் இருப்பது (12 ம் இடம்)
9. சிம்மம், கும்பத்தில் செவ்வாய் இருக்க, அது 2, 4, 7, 8, 12 ஆக இருப்பது

மேற்கண்ட தோஷ விதிவிலக்குகள் உண்டு. இன்னும் கூட சில விதிவிலக்குகள் இருக்கலாம். செவ்வாய் தோஷம் பற்றி முழுதும் அறியாமல் எந்த ஜாதகத்தையும் நிராகரிக்காதீர்கள்!!